អង់គ្លេស៖ ក្តីសង្ឃឹមរបស់ Manchester City ក្នុងការកាត់បន្ថយគម្លាត ២ពិន្ទុពីក្រុមកំពូលតារាង Arsenal ត្រូវបានរសាត់បាត់ក្រោយពេលដែល Harry Kane បំប៉ោងសំណាញ់ទីមួយគ្រាប់ ជួយឱ្យ Tottenham Hotspurs ដណ្តើមបាន ៣ពិន្ទុនៅទឹកដីរបស់ខ្លួន និងបន្ថយគម្លាតពិន្ទុពីក្រុមលេខ ៤ Newcastle United ព្រមទាំងជួយឱ្យ Arsenal នៅតែបន្តរក្សាគម្លាតនាំមុខដាច់ ៥ពិន្ទុពីក្រុមលេខ ២ ដដែល។ 

គ្រាប់បាល់មួយគ្រាប់ដ៏មានន័យរបស់ Harry Kane នៅនាទីទី១៥យប់មិញនេះ បានជួយឱ្យរូបគេក្លាយជាកីឡាករដ៏សំខាន់និងជាអ្នករកគ្រាប់បាល់បញ្ចូលទីច្រើនជាងគេបំផុតឱ្យក្រុមមានមូលដ្ឋាននៅភាគខាងជើងទីក្រុងឡុងដ៍មួយនេះ ដោយស៊ុតបញ្ចូលទីឱ្យ Spur សរុបចំនួន ២៦៧គ្រាប់ បំបែកកំណត់ត្រារបស់អតីតកីឡាករ Jimmy Greaves ដែលកាន់កាប់តាំងពីឆ្នាំ១៩៧០។

ជ័យជម្នះនេះបានធ្វើឱ្យអ្នកគាំទ្ររបស់ Arsenal បានចេញមកអបអរណែនណាន់តាន់តាប់ពាសពេញផ្លូវ Seven Sisters បន្ទាប់ពីនៅតែបន្តរក្សាគម្លាតនាំមុខ ទោះបីជាទើបតែបរាជ័យទល់នឹងក្រុមតំបន់បាតតារាង Everton កាលពីយប់ថ្ងៃសៅរ៍ក៏ដោយ។ 

Manchester City លេងបាន ២១ប្រកួតកំពុងឈរនៅចំណាត់ថ្នាក់លេខ ២ ដោយមាន ៤៥ពិន្ទុ តាមពីក្រោយក្រុមកំពូលតារាង Arsenal មាន ៥០ពិន្ទុ ប៉ុន្តែទើបលេងបាន ២០ប្រកួតប៉ុណ្ណះ ខណៈក្រុមទាំងពីរនឹងជួបគ្នានៅថ្ងៃទី១៥ ខែកុម្ភៈខាងមុខនេះ។ ដោយឡែក Tottenham Hotspurs ក្នុងការប្រកួតយប់មិញពុំមានវត្តមានអ្នកចាំទី Antonio Conte ឡើយដោយបុរសជនជាតិអ៉ីតាលីរូបនេះកំពុងសម្រាកព្យាបាលជម្ងឺក្រោយវះកាត់នៅមន្ទីរពេទ្យ ហើយបច្ចុប្បន្ក្នក្រុមរបស់លោកកំពុងឈរលេខ ៥ មាន ៣៩ពិន្ទុ ក្រោយលេងបាន ២២ប្រកួត តាមពីក្រោយ Newcastle United ឈរនៅលេខ ៤ មាន៤០ពិន្ទុ និងទើបលេងបាន ២១ប្រកួតប៉ុណ្ណោះ៕